Trump threaten South Africa to cut funding over land policy
Source:TodayFeedsMedia
Trump threaten South Africa to cut funding over land policyImage
US President Donald Trump don tok say e go cut all future funding to South Africa sake of accuse say di kontri dey take pipo land and dey treat "certain classes of pipo very bad".
Last month, President of South Africa Cyril Ramaphosa sign a new law wey allow goment to seize pipo land witout compensation in certain circumstances.
Land ownership for South Africa na controversial issue bicos na di oyibo pipo for di kontri still get most of di farmlands, 30 years afta di end of di racist system of apartheid.
Pipo bin don dey call on goment to address land reform and deal wit di past injustice of racial segregation.
On Sunday, Trump write on im social media platform Truth Social: "I go cut off all future funding to South Africa until dem complete full investigation of dis situation!"
Later, wen e dey tok wit tori pipo, Trump say di South Africa goment "dey do some terrible tins, horrible tins".
"So dat one dey unda investigation right now. We go make a determination, and until we find out wetin South Africa dey do — dem dey take away land and dey confiscate land, and actually dem dey do tins wey dey perhaps far worse dan dat."
In response, South Africa Minister for International Relations, Ronald Lamola, also write for X say im bin hope say Trump advisers go use "dis investigative period to deepen dia understanding of South Africa policies as a constitutional democracy".
"Such insights go ensure a respectful and informed approach to our democratic commitments," oga Lamola tok.
Di South African president say di goment neva confiscate any land.
For inside one statement, Ramaphosa say di new law no be "confiscation instrument, but na constitutionally mandated legal process wey go ensure public access to land in an equitable and just manner as guided by di constitution".
E say South Africa no dey receive any oda funding from di US except for di US aid programme Pepfar, wey represent "17% of South Africa HIVAids programme".
Di US bin allocate about $440m in assistance to South Africa for 2023, according to data from di US goment.
Di South African goment say di new law no allow anyhow seizures of land as dem must first try to reach agreement wit di owner.
Vincent Magwenya, di tok-tok pesin for President Ramaphosa explain last month say di state "no go seize property anyhow or for a purpose wey no be ... in di public interest".
E say di current system of "willing seller, willing buyer" dey allow white farmers to delay di process of land reform.
However, some critics don express fear say di law fit get disastrous consequences like e happen for Zimbabwe, wia land seizures bin scatter di economy and scare away investors.
Efforts to address di issue of land inequality for South Africa don cause criticism in di past, including from Elon Musk, who dem born for South Africa and wey now be one of Trump advisers.
"Why you get openly racist ownership laws?" Elon Musk bin respond to Ramaphosa statement on X.
For 2018, for im first term as president, Trump bin ask di US Secretary of State dat time, Mike Pompeo, to study South Africa "farm seizures and expropriations and di large scale killing of farmers".
https://bbc.com/Trump threaten South Africa to cut funding over land policy/
